السلام عليكم
لو انت بتحمل ملف ، والملف قدامه ساعة لغاية ما يخلص تحميل ، وأنت عايز الجهاز يقفل تلقائيا بعد ساعة تعمل ايه؟
طبعا فيه برامج بتؤدي الوظيفةدي
لكن
ليه تستخدم برامج طالما ممكن متستخدمهاش

الطريقة سهلة جدا ، اتبع الخطوات التالية:

1- روح على سطح المكتب واضغط كليك يمين
2- من القائمة اختار
New >> shortcut
3- هيطلع لك حوار ، اكتب فيه السطر ده
shutdown -s -t 3600
طيب أنا ليه اخترت 3600؟؟
لأن ده عدد الثواني اللي المفروض الجهاز يقفل بعدها ، أنا عايزه يقفل بعد ساعة ، والساعة فيها 60 دقيقة والدقيقة 60 ثانية
60 x 60 = 3600
4- اضغط next
 هيطلع لك حوار تاني ، اكتب فيه اي حاجة وليكن "غلق الجهاز بعد ساعة"
5- اضغط Finish

هتلاقي اتكون لك أيقونة على سطح المكتب باسم "غلق الجهاز بعد ساعة" لو ضغطت عليها يبقى أنت أمرت الجهاز يقفل بعد ساعة.

طيب لوغيرت رأيك ومش عايزه يقفل الوقتي خالص تعمل ايه؟
هتعمل ايقونة تانية لالغاء الأمر
نفس الخطوات السابقة بس هتكتب السطر التالي في الخطوة التالتة:

shutdown -a
وطبعا هتسميه "الغاء غلق الجهاز"

جميل

طيب لو عايز تخليه يقفل بعد نص ساعة مش ساعة ، هتعمل واحدة تانية؟ لا طبعا ، هتعدل في الموجود.
1- اضغط كليك يمين على الايقونة اللي اسمها "غلق الجهاز بعد ساعة"
2- اختار properties
3- هتطلع لك نافذة ، هتلاقي فيها السطر القديم ومكتوب فيه القيمة 3600 اللي بتساوي ساعة ، غيرها خليها 1800 اللي بتساوي نص ساعة

أتمنى أكون أفدتكم
نسعد بتعليقاتكم على الموضوع